​ദോഹ: ദോഹയിൽ വൻ ജനപങ്കാളിത്തത്തോടെ സമാപിച്ച മൂന്നാമത് ഇന്ത്യൻ മാംഗോ ഫെസ്റ്റിവലിന്റെ ('ഹംബ സീസൺ 3') വൻ വിജയം ആഘോഷിച്ച് ഇന്ത്യൻ എംബസിയും ഐ.ബി.പി.സി (ഇന്ത്യൻ ബിസിനസ് & പ്രൊഫഷണൽസ് കൗൺസിൽ) ഖത്തറും. ഫെസ്റ്റിവലിന്റെ വിജയത്തിന് പിന്നിൽ പ്രവർത്തിച്ചവരെ ആദരിച്ചു.
​സൂഖ് വാഖിഫും ഇന്ത്യൻ എംബസിയും സംയുക്തമായി സംഘടിപ്പിച്ച പത്ത് ദിവസം നീണ്ടുനിന്ന മേളയുടെ എക്സിക്യൂഷൻ പാർട്ണർ ഐ.ബി.പി.സി ഖത്തർ ആയിരുന്നു. ഇന്ത്യയും ഖത്തറും തമ്മിലുള്ള സാമ്പത്തിക, സാംസ്കാരിക, ജനകീയ ബന്ധങ്ങൾ കൂടുതൽ ഊഷ്മളമാക്കാൻ ഈ ജനപ്രിയ മേളയ്ക്ക് സാധിച്ചു.സ്വകാര്യ എഞ്ചിനീയറിംഗ് ഓഫീസിലെ (PEO) ഇവന്റ്സ് ജനറൽ സൂപ്പർവൈസർ ഖാലിദ് സൈഫ് അൽ സുവൈദി, സൂഖ് വാഖിഫ് ഉദ്യോഗസ്ഥരായ ജവാഹർ അബ്ദുള്ള അൽ മുല്ല, ഉബൈദുള്ള മുഹമ്മദ് അഷ്റഫ്, അബ്ദുൽറഹ്മാൻ ഇബ്രാഹിം ഷഹീൻ എന്നിവർ ചടങ്ങിൽ പങ്കെടുത്തു.
​സഹകരണം കമ്മ്യൂണിറ്റിയെ വളർത്തുന്നു:
"കമ്പോളങ്ങളിൽ മത്സരം സ്വാഭാവികമാണ്, എന്നാൽ ബിസിനസുകൾ ഒരു പൊതു ലക്ഷ്യത്തിനായി ഒന്നിച്ച് പ്രവർത്തിക്കുമ്പോൾ എല്ലാവരും വിജയിക്കുമെന്ന് ഈ മേള തെളിയിച്ചു. ഇത് വെറുമൊരു വിപണി മാത്രമല്ല, ഇന്ത്യയും ഖത്തറും തമ്മിലുള്ള ദൃഢമായ സൗഹൃദത്തിന്റെ ആഘോഷം കൂടിയായിരുന്നുവെന്ന്
ഐ.ബി.പി.സിപ്രസിഡന്റ്
 താഹ മുഹമ്മദ് അബ്ദുൽ കരീം പറഞ്ഞു.മേള വൻ വിജയമാക്കാൻ പിന്തുണ നൽകിയ സൂഖ് വാഖിഫ് സംഘാടകർക്ക് ചടങ്ങിൽ സ്മരണികകൾ സമ്മാനിച്ചു. പങ്കെടുത്ത എല്ലാ എക്സിബിറ്റർമാർക്കും സർട്ടിഫിക്കറ്റുകളും വിതരണം ചെയ്തു. മേളയുടെ വിജയത്തിൽ പങ്കാളികളായ എല്ലാവരെയും ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ സന്ദീപ് കുമാർ അഭിനന്ദിച്ചു.
​വരും വർഷങ്ങളിലും ഇരുരാജ്യങ്ങളും തമ്മിലുള്ള വ്യാപാരം, കൃഷി, ടൂറിസം, സംസ്കാരം എന്നീ മേഖലകളിലെ സഹകരണം കൂടുതൽ ശക്തമാക്കാൻ സംയുക്തമായി മുന്നോട്ട് പോകുമെന്ന് ഇന്ത്യൻ എംബസിയും ഐ.ബി.പി.സിയും സൂഖ് വാഖിഫും ചടങ്ങിൽ വ്യക്തമാക്കി